21.06.14
Krankenkasse op platt / Homepage snackt Plattdüütsch
Homepage snackt Plattdüütsch
Weltnett-Sieden vun en Krankenkass, de snacken doot – un dat op Platt. Dat hett sik de BKK Sleswig-Holsteen utklamüsert. Wat dorbi rutsuert is, dat is nu ünner www.bkk-sh.de to hören: Ut „Zahnreinigung” warrt dor denn „Tään-Reinmaken” un wenn wat „kostenlos” is, denn „kost dat jümmers nix”. Ümsett hett dat för de Krankenkass in swore, avers allerbeste Arbeit de lütte un innovative Weltnett-Agentur EDV MAHO mit de Lüttenwestedter Hans Peter Kuenzel. He is sotoseggen de Stimm vun de „weltwiet eenzige plattdüütsche Krankenkass”.
Bi den groten Barg vun Texten keem dat för de BKK Sleswig-Holsteen al ut Wirtschopsgrünnen nich in de Tüüt, profeschonelle Spräkers oder en Spraak-Software intokopen. Dat harr eenmal to lang duert un weer ok noch veel to düer wurrn, wiel dat so wat för Plattdüütsch noch nich geven deit. Elkeen enkelte Siet wurr in nipp un nau fastleggte Frequenzen un Takttallen in Ton bröcht. Dat weer swoor. All Sätz mussen in beide Spraken kloor un dütlich snackt warrn.
Teel weer, dat nix afhackt klingen deit as bi mennigeen automaatsche Audio-Spraakdatei un dat de opnahmen Dateiformaten vun Google Chrome, Internet Explorer, Mozilla Firefox un anner Desktop- un Mobile-Browsers, de begäng sünd, annahmen warrt. Dat is allens op’t Best trecht kamen. Un wat dorbi rutsuert is, dat lett sik goot hören.
Quelle: Zeitschrift der BKK S-H - Krankenkasse für Schleswig-Holstein / Juli 2014